Македонската борачка Андреа Нисева, членка на Боречкиот клуб Олимпија од Штип, веќе ги одработува завршните подготовки за Светското првенство за кадетки до 17 години, кое ќе се одржи од 28 јули до 3 август во Атина, Грција. Нисева ќе настапи во категоријата до 61 килограм.
Подготовките се одвиваат во Софија, Бугарија, каде Македонката учествува во заеднички тренинг-камп со бугарската репрезентација. Овој камп претставува одлична можност за Андреа да го подобри своето физичко и техничко ниво преку интензивни тренинзи, спаринг средби со силни меѓународни противнички и ментална подготовка, со што целта е да влезе во врвна форма пред најголемиот предизвик сезонава.
Иако има само 17 години, Андреа веќе има богато искуство и бројни успеси на домашната и меѓународната сцена. Таа е повеќекратна државна шампионка, а минатата година го освои бронзениот медал на Балканското првенство. Исто така, настапуваше на Европскиот шампионат во Хрватска, како и на неколку престижни турнири во Србија, Бугарија и Турција, каде редовно се искачува на пиедесталот.
Андреа оди на Светското првенство со голема желба за успех и решителност да го даде својот максимум. Со силна поддршка и упорност , таа ќе се стреми да ги претстави боите на македонската боречка сцена на највисоко ниво.
