Македонскиот десен бек Тодор Тодороски ќе има нов фудбалски предизвик откако потпиша договор со амбициозниот албански клуб Фљамуртари. 26-годишниот фудбалер од Прилеп, по одреден период без клуб, се враќа на сцената со желба да ја рестартира кариерата во полн ек.
По разделбата со Политехника Јаши во 2024 година, Тодороски беше во потрага по средина каде што ќе добие континуитет и доверба, а раководството на Фљамуртари препозна потенцијал и искуство во неговиот профил. Претходно, Тодороски беше дел од неколку клубови ширум Европа, а настапуваше и во Првата македонска лига, каде ги носеше дресовите на Вардар и Металург.
Тој има и шест настапи за сениорската репрезентација на Македонија, што дополнително говори за неговото искуство и квалитет. Со преселбата во Влора, тој ќе се обиде да ја стабилизира својата форма и да се наметне како клучен играч во новата средина.
Инаку, во редовите на Фљамуртари веќе се наоѓа и македонскиот репрезентативен голман Игор Алексовски, кој исто така летово се пресели во клубот од Влора, а за што веќе информираше Спортска Мрежа.
