Македонската атлетска репрезентација испиша златна страница во својата историја на Европското тимско првенство – Трета лига, кое викендов се одржа во Марибор, Словенија. Со вкупно 270.5 освоени бодови, нашите атлетичари го обезбедија највисокиот пласман досега — осмо место, надминувајќи ги сите очекувања со борбеност, дисциплина и одлична форма.
Првиот натпреварувачки ден беше одбележан со низа блескави настапи:
- Андреас Трајковски победи во скок во далечина со извонредни 7.83 метри,
- Дарио Ивановски беше најбрз на 5000 метри, завршувајќи со време од 14:04.06,
- Миљана Ристиќ постави нов национален рекорд на 3000 метри стиплчес со резултат од 11:49.49,
- Брајан Авиа освои бронзен медал во скок во височина, поставувајќи личен рекорд од 2.06 метри,
- Штафетата 4×100 метри (Трајковски, Алексовски, Петров, Стојоски) освои сребро и собори државен рекорд со време од 40.89 секунди.
Вториот ден донесе уште поголеми успеси:
- Огнен Стефановски испиша историја во скок со стап, станувајќи првиот македонски атлетичар што прескокнал 4 метри. Со скок од 4.05 метри тој го собори рекордот стар 57 години,
- Теа Алексовска постави нов младински рекорд во фрлање кладиво со резултат од 38.74 метри.
Вкупно беа соборени четири национални рекорди, десетици лични остварувања, а настапот ја испрати јасната порака дека македонската атлетика живее, напредува и создава иднина. Со посветеност, стратегија и тимски дух, нашата репрезентација се позиционира меѓу најперспективните во Европа.
