Фудбалскиот клуб Пелистер од Битола продолжува со консолидирање на ростерот за сезоната 2025/26, а дел од планот е задржување на клучните фудбалери кои минатата сезона оставија значаен печат во прволигашката битка. Централниот дефанзивец Христијан Грозданоски го продолжи договорот со својот матичен клуб и ќе го носи зелено-белиот дрес и во новата натпреварувачка сезона.
Минатата сезона, Грозданоски одигра 27 натпревари, покажувајќи сигурност и континуитет на позицијата централен бек. Со неговата посветеност, дисциплина и борбен дух, останува еден од носителите на дефанзивната линија во тимот од Битола.
На 24 јуни, фудбалерите на Пелистер ќе се појават на првата прозивка за почетокот на подготовките и ќе му се стават на располагање на новоназначениот стратег, Димитар Капинковски. Битолскиот прволигаш веќе ја потврди соработката и со фудбалерите Јорданчо Наумоски, Филип Миленкоски, Јованчо Трајковски и Александар Ристевски – со што се зацврстува клучната оска на тимот пред стартот на новата сезона.
Со задржувањето на важните имиња во тимот, Пелистер ја најавува својата амбиција да биде сериозен конкурент и во шампионатот и во Купот на Македонија, со цел враќање на старите победнички навики.
