По објавата за новиот стручен штаб во кој Аце Станковски е назначен за нов тренер, а Љубиша Димковски за спортски директор, МРК Куманово продолжува со кроење на ростерот за новата натпреварувачка сезона.
Продолжена соработката со Христијан Крстаноски
Тимот од Куманово денес и официјално објави дека е постигнат договор за продолжување на соработката со ракометарот Христијан Крстаноски, кој ќе остане дел од кумановскиот колектив и во следната сезона. Договорот е потпишан на една плус една година.
Крстаноски, кој е роден во 2000 година и е висок 197 сантиметри, има богато искуство во домашниот ракомет – во кариерата настапуваше за РК Струга, РК Вардар Неготино, РК Металург РА и МРК Куманово, а бил и дел од кадетската репрезентација на Македонија (2018), како и од Б-селекцијата на сениорската репрезентација (2021).
„Ми претставува чест и задоволство што го продолжив договорот со МРК Куманово. Благодарен сум на управата, на играчите и на целокупната ракометна јавност во Куманово за поддршката и добрата соработка. Кога ја добив понудата да продолжам – немав дилеми. Ветувам добри настапи и се надевам на уште подобри резултати во новата сезона,“ изјави Крстаноски.
Виктор Трифуновски – ново засилување за бековските позиции
Кумановци денес го претставија и своето ново засилување – Виктор Трифуновски, кој ќе ја засили екипата на позициите лев и среден бек.
Трифуновски е висок 190 сантиметри и тежок 90 килограми, а во својата кариера помина низ сите младински категории на РК Вардар, потоа настапуваше за РК Аеродром и РК Борец Фруит Ленд, каде беше еден од најистакнатите стрелци во првата лига.
„Искрено, се чувствувам одлично и мотивирано откако потпишав за клуб како МРК Куманово. Со нетрпение ги очекувам подготовките, пријателските натпревари и секако, официјалниот почеток на шампионатот. Верувам дека заедно со тимот ќе ги исполниме сите цели кои ќе ги поставиме,“ изјави Трифуновски по потпишувањето на договорот.
Со вакви потези, МРК Куманово најавува амбициозна сезона во машката ракометна Суперлига, во која ќе се обиде да се позиционира повисоко на табелата и да го зацврсти статусот на стабилен суперлигаш.
