ЖФК Билјанини Извори од Охрид активно продолжува со градењето на ростерот за новата сезона откако клубот го претстави своето трето летно засилување.
Се работи за Мелани Крстовска која во охридскиот второлигаш доаѓа од Плачковица од Радовиш.
17-годишната Крстовска кариерата ја започна во Плачковица и настапуваше од септември 2021 до август 2023 година, кога премина во редовите на Тиверија Брера од Струмица, но тука се задржа само една година, од септември 2023 до август 2024 година, по што одново се врати во радовишка Плачковица.
ЖФК Билјанини Извори ја претстави Мелани како талентирана фудбалерка со борбеност на терен и треба да донесе свежа и нова енергија во тимот кој ќе цели кон освојување на првото место и враќање во Првата женска фудбалска лига.
Како што веќе информираше Спортска Мрежа, ЖФК Билјанини Извори претходно се засили со искусната Јана Ацковска, која доаѓа од редовите на второлигашот Слободен каде беше капитен, како и со Ивана Николовска, која доаѓа од редовите на Топ Гол.
Раководството на клубот од Охрид продолжува со градењето на ростерот за новата сезона, а според информациите на Спортска Мрежа, ЖФК Билјанини Извори во следниот период ќе промовира квалитетни засилувања со кои ќе биде меѓу првите фаворити за шампионскиот пехар.
