Горан Самарџиев е задоволен како неговите избраници го „поминаа“ оној прв дел од подготовките на селекцијата „под 20“ години. Зад нив е едно неколкудневно гостување во Романија, каде младинската репрезентација на Македонија одигра три пријателски натпревари, два против соодветната селекција на Романците и уште еден против нивната селекција „под 18“ години.
„Задоволен сум од досегашното залагање на момците, бидејќи, и тоа како, се борат за место во тимот. Засега имаме навистина добра атмосфера, и секој ден гледаме да напредуваме се повеќе и повеќе како репрезентација, без разлика на тоа што овие момци немаат, ама скоро никакво, прволигашко искуство“- кратко резимира Самарџиев пред она што следува во текот на оваа работна седмица.
Односно уште два контролни натпревари, против младинската репрезентација на Косово.
„Ќе дадеме максимум на секој тренинг и ‘контролите’ кои следуваат, се со цел да се спремиме што е можно подобро за Европското првенство во Ерменија. Секој од нас мора да даде 110 % од своите можности за репрезентацијата и за Македонија“ – дополнува предводникот на нашиот младински репрезентативен состав.
Согласно со планираните активности, веќе во среда, во Скопје, поточно во салата на СРЦ „Кале“ (од 17.часот) ќе гостуваат младинците на Косово. А два дена подоцна, во петок, предвидено е гостувањето во Качаник, каде двете репрезентации ќе го одиграат и вториот пријателски натпревар во средишниот дел од подготовките за настап на ЕП од Дивизијата „Б“ во Ереван.
