Женскиот ракометен клуб Металург Автокоманда од Скопје продолжува да вложува во иднината и развојот на младите генерации. Денес од клубот со особено задоволство информираа за ново засилување во стручниот штаб – Мери Арсениевска од денеска и официјално станува дел од тимот, преземајќи ја улогата на тренер во пионерската и младинската категорија.
Со своето богато знаење, искуство и огромна посветеност, Арсениевска ќе има клучна улога во формирањето и развојот на идните ракометарки на клубот. Нејзиното доаѓање се гледа како стратешки чекор, со цел подигнување на нивото на работа со млади спортисти и создавање на континуитет во производството на домашен играчки кадар.
Оваа соработка истовремено го означува и официјалниот старт на ЖРК Металург Автокоманда во натпреварувањата на пионерска и младинска конкуренција, што претставува значаен момент во развојната политика на клубот. Вклучувањето во младинските лиги е чекор напред во амбициозната визија на клубот да гради силен и стабилен колектив од сопствени сили.
Со овој потег, Металург Автокоманда јасно покажува дека не само што гледа кон сегашноста, туку активно гради основа за светла иднина. Очекувањата се големи, а ангажманот на Мери Арсениевска се смета за одличен потег во тој правец.
