Откако ФФМ го суспендираше теренот во Кавадарци, Тиквеш како домаќин против Силекс во рамки на 8. коло од Првата македонска фудбалска лига одлучи да игра во Кичево. Тоа значи дека Кичево после неколку годишна пауза одново ќе следи прволигашки фудбал.
Натпреварот меѓу Тиквеш и Силекс ќе се одигра на Градскиот стадион во Кичево, в недела со почеток од 14 часот, а главен судија на мечот ќе биде Игор Стојчевски од Скопје.
Дополнително ќе биде познато колку натпревари ќе биде суспендиран теренот во Кавадарци, а во продолжение официјалната одлука на ФФМ за суспендирањето на теренот во Кавадарци.
„Фудбалската федерација на Македонија ја информира јавноста дека теренот (Градски стадион Кавадарци) СЕ СУСПЕНДИРА според член 77, 87 и 90 од Правилник на натпревари на ФФМ поради напад (фрлено полно пластично шише) кон втор асистент судија Гоце Петревски при што натпреварот бил прекинат. Суспензијата трае до донесување на конечна одлука на Дисциплинска комисија на ФФМ и е во рамки на натпревар од 6. коло на ПМФЛ помеѓу ГФК Тиквеш 1930 Кавадарци – ФК Вардар АД одигран на 22.09.2024 годинa. Комисијата за натпревари на ФФМ според член 87 и 90 од Правилник за натпреварување на ФФМ со службен резултат ГФК Тиквеш 1930 – ФК Вардар 0:3 го регистрираше овој натпревар.“
Покрај суспендирањето на теренот натпреварот меѓу Тиквеш и Вардар е регистриран со службени 0:3 во полза на скопскиот тим.
Во минатото Напредок од Кичево настапуваше во Првата македонска фудбалска лига, но во сезона 2012/2013 како последнопласиран со 18 бодови испадна од фудбалската елита, а сега настапуваше во Трета лига – Запад, со што Кичево остана без прволигашки фудбал, а овој град најчесто натпревари од Првата лига гледа кога екипа како во случај на Тиквеш им е суспендиран домашниот терен. Во минатото таков случај беше Шкупи.
