Женскиот ракометен клуб Ѓорче Петров за новата сезона го крои тимот со тоа што претстави неколку нови ракометарки, а притоа ја продолжи соработката со неколку ракометарки.
Како прво засилување шампионот ја престави Анастасија Трпеска, младинска репрезентативка, која после две сезони минати во Металург Автокоманда, се враќа во Ѓорче Петров, каде што има настапувано за младинските категории.
19-годишната Трпеска игра на позицијата пивот и е дел од поширокиот список кај селекторот Симовски, за подготовките за настап на младинското Европско Првенство.
Шампионот го комплетираше пивотменското трио – Катерина Дамјаноска, Ива Велкова и Анастасија Трпеска. Трите девојки се на репрезентативниот список на Македонија.
На голманската позиција Ѓорче Петров ја задржи бразилката Флавиа Лима Габина, која го продолжи договорот со македонскиот шампион, а дополнително „лавиците“ ја промовираа репрезентативката Марија Јовановска од Куманово меѓу стативите.
„Лавиците“ го продолжи договорот со македонската репрезентативка Емилијана Ризоска, која игра на левата крилна позиција, а ново засилување ќе биде левото крило Стефанија Ѓорѓиевска, која доаѓа од редовите на Чаир.
Шампионот се засили со сестрите Борјана и Бојана Коцева, двете репрезентативки во пакет доаѓаат од редовите на Металург Автокоманда.
Бојана игра на позицијата среден бек, додека Борјана на сите три бековски позиции.
Последно засилување во редовите на ЖРК Ѓорче Петров е 22-годишната бугарска репрезентативка Стефани Пламен Петрова, која доаѓа од шпанскиот тим Маравиња, а потекнува од бугарскиот тим АРХГ Габрово. Петрова игра на позицијата лев бек, и има настапи за кадетската, младинската и сениорската репрезентација на Бугарија.
