Детонит Плачковица според планот дојде до трите бодови во дуелот со Осогово во Кочани, каде радовишани триумфираа со 1:3, за што веќе Спортска Мрежа објави комплетен извештај за натпреварите.
По мечот одигран на Градскиот стадион во Кочани, шефот на стручниот штаб на Детонит Плачковица, Горан Здравков за Спортска Мрежа рече дека неговиот тим имал одличен меч, бодовите за нив биле важни и дека фокусот е на мечот со Кожуф.
“Одличен натпревар, за нас важни беа бодовите во Кочани, имавме доста мотивиран противник кој имаше желба за надигрување и тоа ни оставаше простор за игра. Ние имавме пет до шест шанси, успеавме да реализираме три од нив. Искрено и домаќинот имаше шанси, нашиот голман беше одличен и тој е херојот на натпреварот со одбранетиот пенал и неколку шанси кои ги имаше противникот. Брзиот гол не извади од баланс, но потоа се вративме во игра. Атмосферата е одлична и позитивна во нашите редови. Честитки до моите играчи за одличната игра и триумфот. Сега мораме да се одмориме за следниот меч против Кожуф кој го играме сабота на гостински терен”, изјави Здравков за Спортска Мрежа.
Веќе во сабота екипата на Детонит Плачковица ја очекува гостување во Гевгелија против Кожуф, во рамки на 6. коло од Втората лига.
