Еден од најдобрите ракометари и стрелци во македонскиот ракомет Ивица Илиев реши да стави крај на професионалната играчка кариера.
Илиев како играч на Радовиш каде долги години настапуваше во овој клуб вчера го одигра последниот натпревар против Пролет, а по истиот се одлучи да стави крај на кариерата, но како што најавува ќе остане и понатаму во служба на ракометот.
Илиев важи за вистински „бомбардер“ кој ги „решеташе“ мрежите на противниците, беше вистински лидер во тимовите каде што настапуваше и секогаш кога беше тешко или се кршеше резултат за победа велешанецот ги решаваше тие моменти за добивање на натпреварот.
„Секој почеток има и свој крај… огромна благодарност до сите свои соиграчи со кои сум ја градел својата кариера. Огромна благодарност и до тренерите кои допринеле да опстанам и постанам тоа што сум денес, а најголема благодарност до мојата фамилија и навивачите кои во сите тешки моменти ме натерале да продолжам понатаму. Не е ова крај само едно ново поглавје кое ќе продолжи и ќе трае, секогаш во служба на ракометот. Се гледаме до нови спортски успеси и нови поглавја“, рече Илиев.
Низ својата кариера најмногу време помина во Радовиш во неколку наврати, неговиот матичен клуб е Борец, а настапуваше и за Голден Арт и Овче Поле и во Либан.
Илиев има добиено голем број на признанија и плакети за особен придонес во клубовите каде настапувал и за афирмација на ракометот како спорт.
