Најдобрите македонски одбојкарки забележаа нова сигурна победа во ЦЕВ Европската Сребрена лига 2025, совладувајќи го домаќинот Фарски Острови со убедливи 3:0 (25:11, 25:21, 25:16) на отворањето на вториот турнир од ова натпреварување.
Македонките уште пред натпреварот најавија дека имаат реални шанси за победа, но тоа го потврдија и на теренот, прикажувајќи зрелост и квалитет во сите сегменти од играта. Селекторот Стефан Пауновиќ им даде шанса на сите 12 одбојкарки кои ги имаше на располагање, а секоја од нив соодветно ја оправда довербата.
Македонија доминираше со прецизен и агресивен сервис, реализирајќи вкупно девет ас сервиси, а дополнителна предност донесоа и големиот број на технички грешки на домашната селекција. Нашите одбојкарки изгледаа сигурно и на мрежата и во одбраната, предводени од Теа Терзиевска и Ана Фасулева, кои постигнаа по девет поени. Тамара Стојанова додаде седум, а Ана Павловска пет поени.
Следниот натпревар Македонија го игра утре од 18:00 часот против Австрија – репрезентација која важи за фаворит и ќе биде посериозен тест за формата и амбициите на нашата селекција.
Виолета Јанчева, Спортска Мрежа
