Екипата на Мал Ајакс е новиот шампион во Втората футсал лига на Македонија, откако во последното коло во Штип ја совлада Партизан Југ од Брвеница со убедливи 11:1 и го подигна шампионскиот пехар.
Тимот предводен од Влатко Манев одигра извонредна сезона со 19 победи и 4 порази, постигна вкупно 163 гола, прими 83, и со освоени 57 бодови го обезбеди првото место и директна промоција во Првата футсал лига.
По неколку сезони пауза, Мал Ајакс се враќа во македонската футсал елита. На последниот натпревар како второлигаш, тимот дојде до убедлив триумф со головите на Седат Мамудов (3), Иса Дурмишов (2), Сердар Синанов (2), како и по еден погодок на Тиквешанец, Тошец и Трајанов. Дополнително, Михаил Спасовски од Партизан Југ си постигна автогол. Единствен стрелец за гостите беше Дејан Геровски, кој погоди во второто полувреме.
Иако Балкан славеше на гостувањето во Битола против Конзули со 2:4, тоа не беше доволно за титула, поради победата на Мал Ајакс. Балкан сезоната ја заврши на второто место со само еден бод помалку, но исто така обезбеди пласман во елитната лига.
Стрелци за Балкан беа Игор Барџовски со хет-трик и Имер Ќамили, кој погоди во 19. минута за 0:1. За домашниот тим од Битола, во листата на стрелци се запишаа Виктор Гелевски и Петар Илиоски.
Колото се комплетира денес со останатите натпревари. Победа во Прилеп ќе игра со Кратово, ССК Скопје против Карадаку, а пак Кашриака против СЕЕ Университи.
