Второто коло од Трета лига – Југозапад донесе многу погодоци, а највисока победа забележа Кравари откако дома со 9:1 ја „распадна“ екипата на Велешта, во меч каде Антонио Марцевски и Антонио Јаревски постигнаа по три гола, по еден гол постигнаа Темур Емини и Иванчо Јовановски, а пак Ермир Нура си постигна автогол.
За гостинот единствен стрелец беше Бењамин Нура, кој постигна гол во 70. минута од мечот.
Ланскиот шампион Кораб преку четири гола на Фатјон Леши го доби убедливо Славеј од Мешеишта на Градскиот стадион во Дебар, каде стрелци за поразената екипа беше Аќимовил и Крцоски.
Реми со шест погодоци за Влазними и Евротип во Струга, во меч каде Албан Дани беше херој за домашниот тим кој во 91. минута погоди за бод.
Петрески во 19. минута погоди за 1:0, а пак Шадов за 1:1 на полувреме. Во вториот дел со два гола Кузманов обезбеди предност за Евротип на 1:3. Во 67. минута Шадов со втор гол намали на 2:3, а пак Дани во 91. минута за конечни 3:3.
Новиот третолигаш Света Троица преку трите гола на Боге Бимбилоски го совлада ланскиот второлигаш Караорман со резултат од 3:1. За стружани единствен стрлец беше Крсте Пејчиноски во 93. минута.
Светлост на домашен терен доживеа голем пораз од екипата на Сатеска од Волино со резултат од 4:6. На полувреме гостинот од Волино имаше предност од 2:4, а за домашниот тим стрелци беа Митревски, Радевски, Талевски и Кочишки, додека пак за гостинот Никола Секулоски беше стрелец на три гола, а по еден гол постигнаа Малески, Стоески и Тупанчески.
Демир Хисар на домашен терен загуби од Преспа од Ресен со резултат од 0:2, а стрелци беа Неџми Реџепи и Никола Пластиновски во вториот дел.
