Македонскиот фудбалер Дарко Додев заминува од Силекс и кариерата ќе ја продолжи во нова средина, а како што дознава Спортска Мрежа, 27-годишниот фудбалер од Неготино е на радарот на неколку европски екипи.
Во следниот период ќе треба Додев да ја одбере најдобрата понуда од тие кои веќе пристигаат на неговата адреса.
Фудбалерот кој може да игра како лево и десно крило, оваа сезона постигна осум погодоци и имаше пет асистенции во дресот на Силекс од Кратово во Првата македонска фудбалска лига, а имаше еден гол и асистенција и во Купот на Македонија за вкупно девет гола и шест асистенции.
Зад Додев е успешна сезона, а интерес за него пројавуваат ФК Кајрат од Казахстан, Истра од Хрватска, Зира од Азербејџан, Универзитатеа Клуж од Романија, РФС од Летонија, потоа екипата на Зимбру од Молдавија, како и украинските екипи Верес, Епицентр и ЛНЗ.
Низ својата кариера беше дел од Металург, Силекс, Тиквеш, Брегалница, Влазнија од Албанија и Шкупи.
