Женскиот фудбал во Македонија од следната сезона добива нов клуб се работи за ЖФК Некст Левел од Охрид, кој е новоформиран клуб, а кој од следната сезона ќе се натпреварува во Втората женска фудбалска лига, а ќе има и една генерација во младинските категории.
Клубот е основан од страна на Миле Младеновски Илиќ и Марино Маркоски, познато е тоа што Маркоски веќе успешно го раководи ФК Некст Левел, кој се натпреварува во Детската лига на ФФМ, а веќе трета година го организира и големиот Меѓународен фудбалски турнир „Некст Левел“, а на кој Спортска Мрежа е медиумски покровител.
ЖФК Некст Левел го одигра и првиот пријателски натпревар против екипата на Порече од Македонски Брод, а заврши со резултат од 5:3, но резултатот беше во втор план, целта беше да се продолжи со негувањето на пријателството кое трае една деценија и соработката на двата клуба и во иднина, а тренер на новиот охридски клуб ќе биде Миле Младеновски Илиќ. Кормиларот на новиот охридскиот клуб во минатото девет години беше дел од ЖФК Билјанини Извори, но реши да промени средина и да започне со нов предизвик во својата тренерска кариера.
Како што истакнуваат за Спортска Мрежа, се работи за клуб кој ветува тимски дух и квалитет со правилна селекција и посветена работа со младите фудбалски таленти.
Тоа значи дека следната година во Втората женска фудбалска лига ќе има охридско градско дерби.
