Одбојкарите на Струмица со триумф на гостински терен го отворија финалето на плејофот во македонското првенство, совладувајќи го Штип УГД со 1:3 (23:25, 25:22, 19:25, 21:25).
Иако Штипјани важеа за фаворити поради серијата победи над Струмица во последните меѓусебни пресметки, вклучувајќи го и финалето од Купот на ОФМ, тимот на Владо Милев на теренот на „Јордан Мијалков“ покажа зошто ја носи етикетата шампион.
Од самиот почеток домаќините играа под притисок, што резултираше со бројни грешки, особено на сервис. На спротивната страна, Струмица демонстрираше зрелост, концентрација и искуство, водена од капитенот Милев.
Натпреварот понуди динамика, пресврти и одлични поени, но и моменти на пад во играта кај двете страни. Клучен беше пресвртот во четвртиот сет, кога струмичани надополнија негатива од 7:3 и 13:9, поведоа со 15:18 и го приведоа мечот до успешен крај.
Кинтеро беше најрасположен кај победничкиот состав со 16 поени, Нилсен додаде 15, а Милев 13. За Штип УГД најмногу се истакна Задмард со 15 поени, Арсов реализираше 10, а Багаев 8 поени.
Струмица поведе со 1:0 во финалната серија која се игра до три победи. Вториот натпревар е закажан за понеделник во 19:00 часот во салата „Парк“ во Струмица.
