Прволигашот Тиквеш од Кавадарци донесе одлука да го повлече дресот со број 16 во чест на Андреј Лазаров, кој трагично го загуби животот во големата несреќа во Кочани, во која животот го загубија 59 лица.
Лазаров беше познат македонски фудбалер, кој настапуваше за повеќе клубови во домашното првенство, вклучувајќи ги Тиквеш, Работнички и Металург, а во странство ги носеше дресовите на хрватските Горица и Рудеш. Негов последен клуб беше Шкупи, а последниот натпревар го одигра во саботата против Пелистер, во рамки на 24. коло од ПМФЛ.
„Во чест и знак на благодарност за Андреј Лазаров, фудбалер и голем херој кој со своите настапи многу придонесе за успесите на нашиот клуб, дресот со број 16 кој тој го носеше во ГФК Тиквеш, трајно се повлекува од употреба и ќе остане како траен белег да ги краси клубските простории за негов вечен спомен“, се вели во соопштението на клубот од Кавадарци.
