Актуелниот шампион во Првата женска фудбалска лига, Љуботен, за пролетниот дел каде ќе води борба со лидерот Тиверија Брера од Струмица и Каменица Саса за одбрана на титулата се засили со репрезентативката на Црна Гора, Тања Малесија.
Новото засилување на Љуботен доаѓа од редовите на рускиот тим Динамо Москва, а 19-годишната фудбалерка треба да претставува големо засилување во одбраната на Љуботен.
„Се работи за добар и суперквалитетен играч, можеби една од најдобрите на балканот на нејзината позиција, долго време ги следев нејзините настапи, посебно последните натпревари за репрезентацијата на Црна Гора на пријателските натпревари со Македонија, каде прикажа стабилност каква што ни е потребна во одбраната. Се надевам ќе ја направи разликата на теренот и ќе биде еден од главните играчи во одбрана на титулата. Многу сум среќен што управата на клубот успеа да ја донесе во нашите редови, ќе биде вистински хит оваа пролет“, вели тренерот на ЖФК Љуботен, Бојан Стаменковиќ.
Малесија ја имаше и првата изјава за клупската страница.
„Драго ми е што својата кариера ќе ја продолжам во Љуботен. Луѓето во клубот на чело со претседателот и тренерот Стаменковиќ се покажаа како вистински професионалци, што ме уверува дека ќе имаме прав тим кој добро ќе се припреми и ги исполни сите зададени цели оваа сезона. Нестрпливо го чекам доаѓањето во Македонија и почеток на работата во новиот клуб“ изјави црногорската репрезентативка.
Во пролетниот дел целта на Љуботен ќе биде одбрана на титулата, а со тоа и излез во Европа.
