Иако е роден и расте во Соединетите Американски Држави, десетгодишниот Филип Јаневски има македонски корени, а неговото семејство потекнува од Могила.
Љубовта кон фудбалот очигледно е семејна традиција. Неговиот татко долги години го носел дресот на ФК Могила, а денес малиот Филип ги следи неговите фудбалски стапки, покажувајќи го својот талент на фудбалските терени во Америка.
Филип е дел од екипата Elmwood Park Gators U10, која во пролетната сезона 2026 ја освои шампионската титула во категоријата до 10 години, во деветтата натпреварувачка група на лигата MCYSA.
Изминатиот викенд Јаневски успеа да постигне хет-трик со што уште еднаш најавува сезона полна со погодоци.
Ова претставува уште еден убав момент во фудбалската приказна на младиот Филип, кој уште на десетгодишна возраст може да се пофали со освоена шампионска титула со својот тим.
Убаво е кога од далечната Америка пристигнуваат вакви фудбалски приказни, особено кога во нив има дел од нашата Македонија, но и од Могила, од каде што потекнува семејството на младиот фудбалер.
На Филип му посакуваме многу здравје, успеси и уште многу постигнати погодоци. Можеби еден ден токму ова момче ќе го облече и дресот на македонската репрезентација!
