Атмосферата во соблекувалната на Младост е одлична, потврди Ѓорѓе Ѓуриќ пред денешниот меч против Куманово од 7. коло на Суперлигата.
Ѓуриќ истакна дека со оглед на тоа што и Куманово ја бара првата победа, очекува борбен и квалитетен натпревар.
„Атмосферата во соблекувалната е одлична и сите сме максимално фокусирани. Точно е дека имавме добри можности во претходните натпревари против Прилеп и Еурофарм Пелистер 2 кои за жал не ги искористивме, но тоа веќе е зад нас. Притисок секогаш постои во спортот, но тоа кај нас делува како дополнителен мотив. Свесни сме дека и Куманово ја бара првата победа, па затоа очекувам борбен и квалитетен натпревар, каде што со вистинска тимска игра ќе дадеме сè од себе да ги освоиме бодовите“, рече Ѓуриќ.
Ракометарот на Младост се враќа на теренот по повредата, вели дека формата ја враќа постепено.
„Очекувам тежок и динамичен дуел, бидејќи и двете екипи имаат висока мотивација за победа. Што се однесува до мене, по повредата се чувствувам добро и целосно подготвено да му помогнам на тимот. Формата ја враќам постепено, но најважно ми е да го дадам максимумот на теренот и да придонесам за позитивен резултат“, дополни Ѓуриќ во изјавата за Спортска Мрежа.
Натпреварот меѓу Куманово и Младост се игра денес во салата „Перо Наков“ со почеток од 16:30 часот.
