Ракометарите на Бутел Скопје се подготвени за првиот предизвик во двомечот со Горица од второто коло на ЕХФ Европскиот Куп. Македонскиот претставник во Хрватска ги привршува подготовките, со желба со добар настап да ја започне борбата за место во следната рунда.
Избраниците на Стојанче Стоилов денеска го одработија последниот тренинг пред утрешната средба. Во градската сала во Велика Горица, стручниот штаб ги постави последните тактички детали пред гостувањето кај хрватскиот ривал.
Првиот натпревар меѓу Горица и Бутел Скопје е закажан за утревечер, со почеток во 18:00 часот. Словенечките арбитри Сатлер и Пукшиќ ќе ја делат правдата на европската пресметка.
За бутелци ова е важен почеток на двомечот, во кој ќе се обидат да остварат поволен резултат на гостински терен и да си отворат добра можност пред реваншот. Македонскиот тим го очекува нов европски тест, а одговорот ќе го даде теренот во Велика Горица.
