Македонската фудбалска репрезентација вечерва од 20:45 часот ќе истрча на теренот на „Стожице“ во Љубљана, каде што ќе го одигра натпреварот против Словенија во Лигата на нации. Станува збор за најголемиот фудбалски стадион во Словенија и објект кој има посебно место во тамошниот спортски живот.
Стадионот се наоѓа во населбата Бежиград, северно од центарот на Љубљана, и е дел од комплексот „Спортски парк Стожице“, во кој се наоѓа и затворена спортска арена. Проектиран е од архитектонското биро Садар + Вуга, а изградбата траела само 14 месеци.
„Стожице“ официјално беше отворен на 11 август 2010 година, со пријателскиот натпревар меѓу Словенија и Австралија. Домаќинот ја одбележа премиерата со победа од 2:0.
- Стадион „вдлабнат“ во паркот
Една од најкарактеристичните работи за „Стожице“ е неговиот архитектонски изглед. Стадионот е изграден под нивото на платото на паркот, односно структурата е буквално „вдлабната“ во просторот.
Над рамнината на паркот се издигнува само покривот над трибините, кој создава препознатлива форма налик на монолитен кратер.
Вкупната изградена површина изнесува 24.614 квадратни метри, а стадионот има капацитет од 16.038 гледачи. Од нив, 558 се ВИП-седишта, додека се обезбедени и 97 места за лица со попреченост.
За медиумите е предвиден простор со капацитет за 210 новинари, што овозможува услови за следење и известување од големи спортски натпревари.
- Домот на Олимпија и словенечката репрезентација
„Стожице“ е домашен терен на Олимпија Љубљана, а воедно е и главниот стадион на кој словенечката фудбалска репрезентација ги игра своите натпревари.
До септември 2026 година, националниот тим на Словенија на овој стадион има одиграно 60 натпревари.
Стадионот не е наменет само за фудбал. Просторот е проектиран и за одржување културни и музички настани, при што капацитетот за концерти може да надмине 20.000 посетители.
Првиот голем културен настан се одржал уште на 20 септември 2010 година, нешто повеќе од еден месец по официјалното отворање. Настанот „Notpadu lajv?!“, реализиран од комичарите Ладо Бизовичар и Јури Зрнец, привлече повеќе од 20.000 луѓе.
- „Стожице“ има испишано и европска фудбалска историја
Во 2021 година, „Стожице“ беше еден од осумте стадиони на кои се играше Европското првенство за играчи до 21 година. На стадионот во Љубљана се одигра и финалето меѓу Германија и Португалија.
Рекордната посетеност на еден фудбалски натпревар на „Стожице“ дојде на 20 ноември 2023 година. Дуелот меѓу Словенија и Казахстан во квалификациите за Европското првенство 2024 го следеа 16.432 гледачи, што беше најголема посетеност на фудбалски натпревар во Словенија од осамостојувањето во 1991 година.
Рекордот подоцна беше израмнет на 26 март 2024 година, кога Словенија во пријателски натпревар ја пречека Португалија.
- Вечерва – Словенија и Македонија пред „Стожице“
Токму на овој стадион вечерва ќе се сретнат Словенија и Македонија во второто коло од Лигата на нации. Почетокот на натпреварот е закажан за 20:45 часот.
За Македонија, „Стожице“ вечерва ќе биде сцената на која ќе се бара реакција по поразот од Швајцарија (0:3) во Скопје и прекин на негативната серија без постигнат гол.
Со капацитет од над 16.000 гледачи, историја долга 16 години и статус на главен дом на словенечката репрезентација, „Стожице“ вечерва ќе биде повеќе од обичен фудбалски терен – местото каде Словенија ќе ја пречека Македонија во битка за важни бодови во Лигата на нации.
