Бутел Скопје доби балкански противник во второто коло од ЕХФ Европскиот куп. На ждрепката во Виена беше одредено скопскиот состав да ги одмери силите со хрватска Горица.
За Бутел ова ќе биде петти европски настап во клупската историја, односно трет во ЕХФ Европскиот куп. Новиот европски предизвик ќе започне со гостување во Хрватска, каде што ќе се одигра првиот натпревар од двомечот.
Горица во пресрет на европскиот дуел влегува со позитивен резултат од домашниот шампионат. Хрватскиот тим во последното коло славеше против Сесвете, екипата која минатата сезона заврши како вицешампион.
Првиот натпревар меѓу Горица и Бутел е закажан за 17 или 18 октомври во Хрватска, додека одлуката за патникот во следната фаза ќе падне на реваншот во Македонија, кој ќе се игра на 24 или 25 октомври.
