КК ТФТ продолжува да го гради својот состав со фокус на младите и перспективни македонски кошаркари, па во клубот пристигнуваат Матеј Митревски и Григориј Ѓорѓевиќ од редовите на КК Вардар.
Митревски има 19 години и настапува на позицијата бек-шутер. Станува збор за млад и перспективен кошаркар кој во дресот на ТФТ ќе добие можност за понатамошен развој и докажување, како во Првата македонска лига, така и на регионалната сцена во АБА2-лигата.
Второто засилување е Григориј Ѓорѓевиќ, еден од најталентираните млади македонски кошаркари и член на младинската репрезентација.
Ѓорѓевиќ зад себе има одличен настап на неодамнешното Европско првенство за кошаркари до 18 години, каде што бележеше просек од 13,4 поени, 4,7 скокови и 6,4 асистенции по натпревар. Со тоа беше трет најдобар асистент на шампионатот.
Младиот бек дополнително се истакна и на М18 „фајнал-форот“, каде што со КК Вардар стигна до титулата, а беше прогласен и за МВП на завршниот турнир. Во финалниот натпревар одигра одлично и запиша 25 поени, девет асистенции и осум скокови.
Со ангажманот на Митревски и Ѓорѓевиќ, ТФТ продолжува со својата стратегија за развој и афирмација на македонските млади кошаркари, давајќи им простор да се наметнат на домашната и регионалната сцена.
