Уште едно европско кошаркарско првенство успешно заврши во Македонија, оставајќи зад себе одлични оценки за организацијата, условите и целокупната реализација на шампионатот.
Кошаркарската федерација на Македонија беше домаќин и организатор на Европското првенство за мажи до 16 години – Дивизија Б, кое се одржа во Скопје и Гевгелија. На шампионатот настапија најдобрите млади кошаркари од повеќе европски земји, а покрај квалитетната кошарка и возбудливите натпревари, првенството беше уште една можност Македонија да ја потврди својата способност за организација на големи меѓународни спортски настани.
За успешната реализација, Кошаркарската федерација на Македонија доби и специјална плакета како признание за успешно организираното првенство.
Сепак, уште позначајни од самото признание беа пофалните зборови од претседателот на FIBA Europe, Jorge Garbajosa, кој за време на својот престој во Македонија позитивно ја оцени организацијата и целокупната реализација на шампионатот.
Garbajosa посочи дека Македонија конечно се етаблира на вистинскиот пат кон градење вистинско и трајно пријателство со „куќата на европската кошарка“, испраќајќи јасна порака дека нашата земја станува сигурен и доверлив партнер на FIBA Europe.
Оваа оценка има особена тежина. Таа не е само признание за успешно организирано европско првенство, туку и потврда дека Македонија чекор по чекор го зацврстува своето место во европското кошаркарско семејство.
Успешната организација на Европското првенство до 16 години – Дивизија Б е уште една потврда за професионалноста, посветеноста и организацискиот капацитет на Кошаркарската федерација на Македонија, но и силен сигнал дека нашата земја повторно гради доверба и партнерски однос со највисоките структури на европската кошарка.
Македонија покажа дека знае да биде добар домаќин. А уште поважно – покажа дека сака и може да биде дел од иднината на европската кошарка.
