Младата македонска тенисерка Сара Митевска (16) со два трофеи го заврши настапот на турнирот „Југ Опен 2026“, кој изминатите денови се одржуваше на терените на ТК Југ во Скопје. Турнирот е од рангот Ј60 Скопје, во конкуренција на тенисери и тенисерки до 18 години.
Митевска триумфираше во сингл конкуренција, откако во финалето ја совлада српската тенисерка Верица Зориќ со 2-1 во сетови (2:6, 6:3, 6:3). Македонската претставничка одигра одличен натпревар и по загубениот прв сет направи целосен пресврт за да стигне до титулата.
Успешен настап Митевска имаше и во конкуренција на двојки. Заедно со Андреја Глушкова од Бугарија стигнаа до трофејот, откако во финалето со 2-1 (6:3, 2:6, 10:4) ги совладаа италијанските тенисерки Анастасија Димитриев и Ноел Зема.
Кај момчињата, македонскиот тенисер Ерион Незири исто така се закити со трофеј во двојки. Незири, заедно со Лазар Младеновиќ од Србија, во финалето со убедливи 2-0 во сетови (6:3, 6:1) ги совладаа Бугарите Борис Борисов и Борис Начев.
Во поединечна конкуренција кај момчињата, најдалеку од македонските претставници стигна Кристијан Јанев, кој настапот го заврши во четвртфиналето.
Следната недела на терените на ТК Југ продолжуваат возбудувањата, со одржувањето на третиот од вкупно четирите турнири во Скопје – „Интеко Опен“.
