ГРК Тиквеш продолжува со засилувањата во пресрет на новата суперлигашка сезона, а нов член на кавадаречкиот состав е тунискиот интернационалец Мохамед Азиз Бен Махфуд, кој пристигнува од редовите на Еурофарм Пелистер 2.
Станува збор за 29-годишен лев бек, кој зад себе има одлична сезона во македонската Супер лига. Во дресот на битолскиот тим беше еден од најстандардните и највлијателните ракометари, а сезоната ја заврши како еден од тројцата најдобри стрелци во шампионатот со 179 погодоци на 30 натпревари.
Со неговото доаѓање, Тиквеш добива искусен и докажан ракометар кој ќе донесе дополнителен квалитет, сигурност и ефикасност во бековската линија. Бен Махфуд важи за играч кој знае да преземе одговорност во клучните моменти, а во Битола пристигна како еден од најталентираните туниски ракометари.
Кавадаречкиот клуб јасно покажува дека има сериозни амбиции за новата сезона и активно работи на создавање конкурентен тим кој повторно ќе се бори за место во плеј-офот на Супер лигата. Континуитетот на клупата останува со тренерот Кристијан Грчевски, а паралелно се засилува и играчкиот кадар.
Претходно, ГРК Тиквеш како прво летно засилување го промовираше искусниот лев бек Тоше Ончев, кој пристигна од Куманово. Со ангажманите на Ончев и Бен Махфуд, кавадаречкиот суперлигаш значително ја засилува бековската линија и добива повеќе решенија во офанзивниот дел од играта.
Со новите засилувања, Тиквеш испраќа јасна порака дека и во претстојната сезона ќе има високи амбиции и ќе се обиде да одигра значајна улога во македонската ракометна елита.
