Одбојкарската федерација на Македонија информираше дека ненадејно почина поранешниот претседател на Федерацијата, Марјан Јованов – Мане, на 58-годишна возраст.
Јованов беше претседател на Одбојкарската федерација на Македонија во периодот од 2007 до 2009 година. Во неговиот мандат беа поставени темелите врз кои подоцна се изградија најголемите успеси на машката сениорска репрезентација на Македонија на меѓународната сцена. Токму во тој период започна создавањето на репрезентацијата која го направи првиот голем исчекор, со бараж-натпреварот против Чешка за пласман на Европското првенство во 2009 година.
По две години на чело на Федерацијата, поради професионални обврски, се повлече од функцијата, но зад себе остави стабилна организација, јасна визија и тим кој продолжи да работи на развојот на македонската одбојка. Неговиот придонес останува значаен дел од успесите што македонската репрезентативна одбојка ги оствари во годините што следуваа.
Како долгогодишен спортски работник и голем вљубеник во одбојката, Јованов и по завршувањето на мандатот остана близок до спортот, секогаш подготвен да помогне со совет и поддршка.
Одбојкарската федерација на Македонија изрази искрено сочувство до неговото семејство, роднините, пријателите и сите што имаа чест да го познаваат.
Погребот ќе се одржи на 30 јуни 2026 година (вторник), со почеток во 11:00 часот, на градските гробишта „Бутел“ во Скопје.
