Второлигашот ФК Пелистер започнува ново поглавје во пресрет на сезоната 2026/27 со именувањето на Димитар Митревски за нов претседател на клубот.
По оставката на досегашното раководство и стручниот штаб, акционерот на клубот – Општина Битола – го направи првиот важен чекор во креирањето на новиот проект, доверувајќи му ја претседателската функција на Митревски, кој го наследува Александар Стефановски.
Од клубот истакнуваат дека Митревски бил нивниот прв избор за оваа позиција и изразуваат задоволство што ја прифатил понудата да го предводи Пелистер во обидот за враќање на клубот во самиот врв на македонскиот фудбал.
Триесет и осумгодишниот Митревски има богато искуство во спортскиот менаџмент и маркетингот. Во јавноста е најпознат по успешното раководење со РК Еурофарм Работник и РК Еурофарм Пелистер, каде остави значаен белег во организацијата и развојот на клубовите.
Новиот претседател веднаш ќе започне со извршување на своите обврски, а во наредниот период ќе го претстави планот за работа, како и новиот шеф на стручниот штаб. Воедно, клубот наскоро ќе ги објави и датумот на почетокот на подготовките, како и програмата за летните подготовки.
