Организаторите на традиционалниот турнир во мал фудбал „Петровден“ во Мешеишта испратија јасна порака дека правилата и принципите остануваат над сè, без разлика за која екипа станува збор.
Според соопштението на Организацискиот одбор, екипата „Бел Мерцедес“ нема да настапи на своите закажани натпревари, со што официјално го завршува учеството на 51. издание на турнирот.
Од Организацискиот одбор потенцираат дека нема да има никакви промени во распоредот по неговото официјално објавување и дека сите учесници се должни да ги почитуваат правилата подеднакво.
Во продолжение го пренесуваме соопштението во целост:
„Традиција долга 51 година не се гради со отстапки, туку со принципи. Овој турнир претставува вистинска спортска институција токму поради тоа што бескомпромисно го штити интегритетот на играта. Ве информираме дека екипата на „Бел Мерцедес“ нема да се појави на закажаните натпревари и со тоа нивното учество е завршено. Организацискиот одбор уште еднаш јасно го потврдува својот дециден став: По официјалното објавување на конечниот распоред – промени нема! Натпреварувањето се одвива според стандарди каде правилата важат апсолутно подеднакво за секоја екипа на теренот. Ниту еден тим, без разлика на името и реномето, не може да биде над правилата, над 51-годишната историја и над почитта кон публиката“, велат организаторите на турнирот во мал фудбал „Петровден“ во Мешеишта.
Со ова, организаторите уште еднаш потврдуваат дека турнирот „Петровден“ и понатаму ќе се води според јасно утврдени правила, со цел да се зачува реномето и традицијата на еден од најдолговечните и најреномирани турнири во мал фудбал во Македонија.
