Ракометниот клуб Бутел Скопје доби големо засилување за новата сезона, откако во своите редови го врати искусниот голман Градимир Чаневски.
Македонскиот чувар на мрежата по четири години повторно ќе го облече дресот на скопскиот клуб, каде претходно настапуваше една сезона. Чаневски ќе биде дел од тимот предводен од новиот тренер Стојанче Стоилов, а неговото искуство треба да донесе дополнителна стабилност меѓу стативите.
Бутел и ова лето останува верен на концептот со домашни ракометари, а ангажманот на Чаневски е јасен показател за амбициите на клубот во пресрет на новата сезона.
Голманот потекнува од школата на Металург, а во својата кариера настапуваше и за Вардар и Вардар Јуниор. Потоа следуваше петгодишен престој во Еурофарм Пелистер, пред првпат да се пресели во Бутел Скопје.
По настапите во македонскиот шампионат, Чаневски го имаше и своето прво интернационално искуство во Израел. Со тимот на Макаби Ришон Ле Зион стигна до шампионската титула, а беше прогласен и за најдобар голман во лигата за сезоната 2023/24.
Во изминатите две сезони беше дел од Охрид, со кој бележеше забележителни настапи, а сега се враќа во Бутел во период кога клубот покрај домашните предизвици ќе настапува и на европската сцена во ЕХФ Европскиот куп.
Враќањето на Чаневски претставува значајно засилување за скопскиот состав, кој постепено го комплетира ростерот за претстојната натпреварувачка сезона.
