Капитенот на македонската машка репрезентација до 17 години, Павел Ѓиновски, доби значајно индивидуално признание по настапот на меѓународниот турнир „Рисинг Старс“ кој се одржа во Букурешт.
Иако нашата селекција не ги оствари посакуваните резултати на турнирот, одличните игри на Ѓиновски не останаа незабележани. По завршувањето на натпреварувањето, организаторите го вклучија македонскиот репрезентативец во идеалната петорка, како награда за неговите константни и квалитетни настапи во текот на целиот турнир.
Бекот на Македонија беше еден од најзабележителните поединци на собирот во романската престолнина, а воедно и најефикасен играч во нашиот национален состав. Со своите настапи покажа лидерски квалитети и беше двигател на играта на македонската репрезентација.
Покрај Ѓиновски, во идеалниот тим на турнирот место добија уште двајца кошаркари од Романија и двајца претставници на Грција, селекции кои оставија силен впечаток во Букурешт.
Ова признание е уште една потврда за талентот и потенцијалот на младиот македонски кошаркар, но и охрабрување за иднината на македонската младинска кошарка, која продолжува да создава перспективни играчи за сениорскиот национален тим.
