Искусниот дефанзивец Дарко Стојанов повеќе не е дел од второлигашот Кожуф. По завршувањето на сезоната, 36-годишниот стопер и клубот од Гевгелија се разделија, откако заеднички ја исполнија главната цел – обезбедување опстанок во Втората македонска фудбалска лига.
Кожуф успеа да го зачува второлигашкиот статус преку баражот, во кој убедливо славеше против Борец, оставајќи го велешкиот тим и натаму да се натпреварува во Третата лига – Југ. Во остварувањето на оваа цел значајна улога имаше и Стојанов, кој со своето искуство и лидерски квалитети беше еден од носителите на играта во одбраната.
Зад Стојанов е богата и успешна кариера. Првите сениорски настапи ги запиша во Вардар, а потоа настапуваше и за Маџари Солидарност, Беласица и Брегалница, каде остави длабока трага и стана едно од препознатливите имиња на клубот од Штип.
Во својата кариера ги носеше и дресовите на Хоризонт Турново, Борец, Ренова, Детонит Плачковица и повторно Вардар, додека интернационално искуство стекна во бугарскиот Дунав Русе.
По завршувањето на епизодата во Кожуф, искусниот стопер е подготвен за нов предизвик. Со оглед на богатото искуство, професионалниот пристап и квалитетите кои ги поседува, нема сомнеж дека Стојанов и понатаму ќе биде интересен за голем број клубови на македонската фудбалска сцена.
