Шкендија Арачиново утре ќе го игра најважниот натпревар во својата клупска историја, откако во баражот за пласман во Првата македонска фудбалска лига ќе се соочи со Пелистер, кој ќе се бори за опстанок во елитното друштво.
Натпреварот ќе се одигра на Градскиот стадион во Кавадарци, место кое буди убави спомени кај фудбалерите на Шкендија Арачиново. Токму на овој стадион минатата сезона екипата од Арачиново го совлада Осогово и обезбеди промоција од Третата лига – Север во Втората лига.
Голманот на Шкендија Арачиново, Антонио Столевски, во изјава за Спортска Мрежа истакна дека атмосферата во тимот е одлична и дека екипата максимално подготвена го очекува утрешниот предизвик.
„Атмосферата е на највисоко ниво, се подготвувавме ова недела како треба да изгледаме за овој натпревар. Го анализиравме противникот доста добро, минатата сезона овој стадион беше среќа за Шкендија Арачиново, зошто да не биде повторно, но сега за Прва лига. Очекуваме доста голема поддршка од нашите навивачите за да стигнеме заедно до целта, пред се нека победи фудбалот, нека се навива спортски“, вели голманот Антонио Столевски во изјава за Спортска Мрежа.
Бараж дуелот меѓу второлигашот Шкендија Арачиново и прволигашот Пелистер се игра утре (недела) со почеток од 16:30 часот на Градскиот стадион во Кавадарци.
