Тиверија Брера го доби дербито на 25. коло на Првата женска фудбалска лига откако со 4:2 славеше над Истатов во Струмица. Резултатот го отвори Ивана Илиева во 10. минута од мечот, а во 20. минута гостинот преку Радица Чонева израмни на 1:1.
Сепак, до крајот на првиот дел Билјана Панеска со два гола обезбеди 3:1 на полувреме за Тиверија Брера.
Во второто полувреме Теона Галабовска во 85. минута постигна гол за 4:1, а во 89. минута Елма Шемсовиќ ги постави конечните 4:2 во Струмица.
Натпреварот меѓу Вардар и Каменица Саса заврши без победник, откако двете екипи ремизираа играјќи 2:2. Туане Де Соуза Фрагосо го отвори резултатот во 18. минута, а десет минути подоцна Теодора Јанковска намали на 1:1. Во 33. минута Туане Де Соуза Фрагосо со втор гол обезбеди 1:2 на полувреме. Радоста на „рударките“ беше скратена во 90. минута со гол на Ива Здравевска за конечни 2:2.
Со голот на Рабија Дервиши во 85. минута шампионот Скопје го доби ланскиот шампион Љуботен со 1:0 во Пржино.
Речица со убедливи 8:0 го испрати Топ Гол во Втора лига. Вања Ристиќ стигна до три гола, двојни стрелци беа Марија Антевска и Лана Спасовска, а еден гол беше дело на Софија Величковска.
Сосема очекувано Ас Јунајтед славеше висока победа над Кочани, откако во Струга резултатот беше 5:1. Јована Павловска и Тамара Лазеска беа двојни стрелци, а еден гол беше дело на Елена Мицевска.
За гостинската екипа единствен стрелец беше Нина Манасиева.
Екипата на Скопје која има 69 бодови пред неколку кола стана шампион, а пак Тиверија Брера го потврди второто место и има во моментот 57 бодови. Истатов е трет со 49 бодови, а пак Љуботен е четврти со 44 бодови.
На 5. место е Каменица Саса со 41 бод, Ас Јунајтед е шести со 38 бодови, Вардар е седми со 23 бодови, Речица е осма со 16 бодови, Кочани е претпоследен и ќе игра бараж за опстанок, а има 10 бода, а на дното е Топ Гол кој испадна во Втора лига со четири бода.
