Организаторот на играта на женската сениорска репрезентација на Македонија, Ерјона Јонузи, во новиот репрезентативен циклус влегува како една од поискусните одбојкарки во националниот тим и една од ретките интернационалки во составот.
На поширокиот список на новиот селектор Милош Гавриловиќ се најдоа голем број нови имиња, а Јонузи верува дека промените можат да донесат свежина и дополнителен квалитет во репрезентацијата.
Искусната организаторка на играта смета дека новата енергија и мотивираност кај помладите одбојкарки ќе бидат дополнителен поттик за тимот во претстојните предизвици и очекува позитивна атмосфера во националниот состав.
„Како интернационалка, која цела сезона настапува во странство искрено ми недостасуваше Македонија и оваа енергија и дружба која ја имаме во репрезентацијата. Сите одлично расположени влегуваме на овој собир. Во оваа средина се чувствувам пријатно, а верувам дека истото се однесува и за секоја девојка која е во екипата. Дури и младите одбојкарки, кои се првпат на собир со А тимот се многу позитивни и мислам дека ќе успееме убаво да се вклопиме и да создадеме добра енергија и хемија, како на теренот, така и надвор од него“, коментира Ерјона Јонузи на стартот на новата репрезентативна акција.
Минатата година женската репрезентација имаше солиден настап во Европската лига, запиша и две победи, но оваа година задачата ќе биде потешка и поради сериозниот карактер – како дел од квалификацискиот циклус за ЕП 2028, кој го добива Европската лига.
„Имаме многу промени во екипата оваа година. Пред се, нов стручен штаб и нов селектор, како и подмладена екипа, дел од поискусните не се со нас во овој циклус. Времето ни е кусо и мораме што побрзо да влеземе во системот и начинот на работа на селекторот. Истовремено ние што имаме малку поголем стаж во репрезентацијата треба да им помогнеме на младите што подобро и побрзо да се вклопат и да ја градиме иднината на македонската женска одбојка. Оваа Европска лига ќе биде потешко, но ништо не е невозможно, очекуваме повторно позитивни резултати. Сите сме оптимисти и одлично расположени, подготвени за работа влегуваме во овој циклус, кој мислам дека на крајот ќе има позитивен исход“ – заклучува Јонузи.
Женската сениорска репрезентација на Македонија веќе го одработи и првиот тренинг во рамки на подготовките за Европската лига 2026. На стартот тимот не беше комплетен, бидејќи одбојкарките на Работнички Скопје и Наковски Волеј добија дополнителен ден за одмор по исцрпувачката финална серија во домашното првенство, која заврши пред само неколку дена.
Избраничките на селекторот Милош Гавриловиќ целиот подготвителен период ќе го реализираат во СЦ „Форца“ во Скопје, каде ќе ја темпираат формата за претстојните предизвици.
Како последна проверка пред стартот на Европската лига, македонските одбојкарки ќе одиграат два контролни натпревари против Косово на 29 и 30 мај.
