Екипата на Стрела 21 од Ерековци обезбеди пласман во големото финале на Општинската фудбалска лига Прилеп, откако по драматична пенал серија го елиминираше Динамо од Мажучиште.
Во регуларниот дел од првиот полуфинален натпревар немаше победник, а дуелот заврши со резултат 1:1. По израмнетите 90 минути, патникот во финалето беше решен преку пенал рулетот, каде што повеќе присебност покажаа фудбалерите на Стрела 21, славејќи со 5:4.
Со овој триумф, тимот од Ерековци направи голем чекор кон шампионската титула во ОФЛ Прилеп, која носи и пласман во Трета лига – Југ за следната сезона.
Во второто полуфинале, кое се игра утре, силите ќе ги одмерат Кадица и Кадино, а победникот од тој дуел ќе биде противник на Стрела 21 во финалната пресметка за титулата и пласманот во повисок ранг.
