Историска одлука на Советот на општина Струмица, откако на седницата одржана на 15. ноември годинава донесена е одлука за давање на трајно користење на теренот со вештачка трева „Филип Лазаревски“ на фудбалскиот клуб Тиверија од Струмица.
За фудбалскиот клуб Тиверија кој се натпреварува во Третата македонска фудбалска лига – Исток ова е голем историски момент.
„Иницијативата на новиот управен одбор на ФК Тиверија предводена пред се од Александар Митев и Зоран Ѓоргиев како и Претседателот Илија Панов и останатите членови беше прифатена од страна на советниците од сите политички партии при Советот на општина Струмица кои едногласно кренаа рака теренот да се даде на трајно користење на фудбалскиот клуб Тиверија. Изразуваме огромна благодарност до сите нив. Најголема благодарност изразуваме до градоначалникот на општина Струмица КОстадин Костадинов како и Претседателот на Советот и поранешен фудбалер Марјан Даскаловски кои застанаа зад иницијативата на нашиот клуб“, велат од ФК Тиверија.
Со ваквата одлука фудбалскиот клуб Тиверија кој опстојува повеќе од 100 години конечно ќе има свој фудбалски терен.
„Сакаме да ги информираме останатите корисници на фудбалскиот терен дека ќе продолжат да го користат истиот за тренинзи и натпревари и со истите ќе склучиме посебен договор за начинот на користење на објектот со кој ќе се регулираат меѓусебните права и обврски. Ветуваме подобри услови за тренинзи и натпревари, струмичките спортисти го заслужуваат тоа“, додаваат од ФК Тиверија.
Клубот настапува во Трета лига – Исток, а есенскиот дел го заврши на дното од табелата со шест бодови на своето конто, а во пролетниот дел целта ќе биде клубот да се издигне и да заврши што повисокото на табелата.
