Здружението на ракометни судии на Македонија, преку својата Стручна комисија, објави јавен повик за пријавување на нови ракометни судии, со цел подмладување и унапредување на судискиот кадар во македонскиот ракомет.
Повикот е наменет за сите љубители на ракометот кои сакаат активно да бидат вклучени во спортот и да се развиваат во професионална и спортска насока. Заинтересираните кандидати треба да имаат најмалку 16 години, да имаат играно ракомет или да поседуваат основно познавање на играта, како и силна желба да бидат дел од ракометното семејство.
Како предуслови се наведуваат добри комуникациски способности, подготвеност за тимска работа, одговорност, дисциплина и почитување на принципите на фер-плеј. Исто така, кандидатите треба да бидат психофизички подготвени и отворени за учество на обуки, семинари и тестирања, како и за судење на натпревари според официјален распоред, најчесто за време на викендите.
Пријавувањето се врши со испраќање кратка биографија (CV) на е-поштата strucna.komisija@gmail.com, а рокот за аплицирање е до 15 февруари.
Од Стручната комисија упатуваат порака до сите млади и мотивирани спортски ентузијасти: сега е вистинскиот момент да се приклучите и да станете дел од ракометот од една поинаква перспектива – како ракометен судија.
