ГРК Охрид и официјално го потврди трансферот кој веќе неколку дена се најавуваше – црногорскиот лев бек Вуко Борозан е нов член на охридскиот суперлигаш. Со ова раководството на клубот уште еднаш испрати јасна порака дека амбициите не застануваат само на добрите резултати од есенскиот дел.
По разделбата со Младен Крсманчиќ и Теимураз Орјоникидзе, беше јасно дека Охрид бара квалитетно и искусно решение во бековската линија. Изборот падна на Борозан, ракометар кој зад себе има богато меѓународно искуство и добро го познава македонскиот ракомет, по настапите за Металург и Вардар.
Иако во изминатиот период се споменуваа повеќе можни дестинации за неговата кариера – од камбек во Црна Гора, преку Словенија, па сè до Блискиот Исток – Борозан реши да остане во Македонија и да го облече дресот на „гладијаторите“. Договорот е до крајот на актуелната сезона, а се очекува тој веднаш да се вклучи во ротацијата на тренерот Борис Ројевиќ.
Охрид добива ракометар со силен шут, физичка доминација и искуство од највисоко ниво, што ќе биде од голема важност и во Суперлигата, но и на европската сцена. Клубот го очекуваат нови предизвици во Купот на ЕХФ, каде што охриѓани ќе се соочат со чешка Дукла Прага.
Со ангажманот на Борозан, Охрид уште еднаш покажува дека проектот се гради со јасна визија и желба за чекор напред – како во домашното првенство, така и во Европа.
