Македонската машка ракометна репрезентација ја дочека ждрепката за мундијалскиот бараж во поволна позиција, како носител, но селекторот Кирил Лазаров веднаш испрати јасна порака – нема простор за потценување, без разлика кој ќе биде ривалот.
Нашиот национален тим во баражот за пласман на Светското првенство 2027 ќе се соочи со победникот од дуелот меѓу Украина и Словачка. Македонија со резултатите во квалификациската група обезбеди место меѓу носителите, со што ги избегна најсилните европски селекции, но селекторот предупредува дека вистинската работа допрва следува.
„Треба да бидеме задоволни од ждрепката. Напорно работевме за да дојдеме до моментот да бидеме во групата на носители и сега сме на добар пат да обезбедиме ново учество на голем настан и да ја продолжиме традицијата на успеси. Мораме да бидеме сериозни и професионално да се однесуваме. Имаме максимална почит кон националните тимови на Украина и на Словачка. Наскоро ќе дознаеме и точно против која репрезентацијата ќе играме, но ние мора уште од сега треба да направиме добар план и подготвени да ги дочекаме тие два натпревари во мај“- изјави Лазаров.
Бараж-натпреварите се закажани за 13/14 и 16/17 мај 2026 година, а победникот од двомечот ќе обезбеди пласман на Светското првенство. За Македонија тоа би значело осмо последователно учество на Мундијал и вкупно десетто во историјата на националниот тим.
