Брера Струмица го промовира второто зимско засилување во пресрет на продолжението од сезоната во Првата македонска фудбалска лига. Нов член на струмичкиот прволигаш е 26-годишниот напаѓач Јан Куаку од Малави, кој веќе му се приклучи на тимот и тренира со екипата.
Куаку во Македонија доаѓа по една сезона помината во Гибралтар, каде настапуваше за прволигашот Европа Поинт. Во тамошниот шампионат одигра 13 натпревари, при што постигна два гола и запиша две асистенции, пред на почетокот на јануари да се раздели со клубот.
Кариерата на офанзивецот започнала во младинските категории на шпанска Хуеска, по што бил дел од Б-тимот на француски Ред Стар. Потоа следуваа интернационални авантури во Полска (Старовице), Молдавија (Пениа Енкарнада), Италија (Монтемилето), Шведска (Кируна), како и настапи во Андора.
Претходно, Брера Струмица се засили и со Леонардо Петровиќ, а во пролетниот дел од сезоната главна цел на клубот ќе биде опстанок во елитното македонско фудбалско друштво. Струмичани во моментов ги одработуваат зимските подготовки во Грција, каде што стручниот штаб ја темпира формата за клучните предизвици што следуваат.
