Еурофарм Пелистер го означи стартот на подготовките за продолжението од сезоната, така што ракометарите денеска се собраа во салата „Боро Чурлевски“ и го одржаа првиот тренинг во новиот циклус.
Поради настапите на Европското првенство во Данска, Шведска и Норвешка, на располагање не беа девет репрезентативци, па тренажниот процес засега се одвива со скратен ростер. Првата сесија беше реализирана под водство на асистент-тренерот Алексо Лембанов, по претходно одржаниот работен состанок со екипата.
Во наредните денови се очекува пристигнувањето на новиот тренер, Стевче Алушовски, како и комплетирање на тимот со вклучување на Алем Хаџиќ и Сеид Хеидарирад. Паралелно со тоа, репрезентативците – Кузмановски, Ристевски, браќата Атанасијевиќ, Пешевски, Митревски, Хенигман, Тајник и Видомски – ќе се приклучуваат по завршувањето на своите обврски на континенталниот шампионат.
Подготовките во текот на јануари ќе се реализираат во Битола, а планирано е и одигрување на неколку контролни натпревари со цел темпирање на формата.
Првиот официјален предизвик во продолжението од Суперлигата пелистерци ќе го имаат на 7 февруари, кога ќе се соочат со Еурофарм Пелистер 2, додека настапите во Лигата на шампионите продолжуваат на 19 февруари со домашниот дуел против Висла Плоцк.
