Владо Милев донесе одлука да се повлече од одбојката, завршувајќи ја својата активна улога и како играч и како претседател на Одбојкарскиот клуб Струмица.
Македонскиот репрезентативец и потпретседател на Одбојкарската федерација на Македонија, Милев зад себе остава богато наследство и длабока трага во македонската одбојка. Во изминатиов периодот кога го водеше ОК Струмица, клубот бележеше континуиран успех и доминација во сите категории, од младинските селекции до сениорскиот тим.
Со повлекувањето на Владо Милев завршува една значајна ера во историјата на ОК Струмица, но неговиот придонес кон клубот и македонската одбојка ќе остане трајно запаметен.
Под негово водство, клубот секоја година е шампион во сите категории – пионери, кадети, младинци и сениори, постигнувајќи континуитет на успех што е реткост во спортот. Владо го реализираше и еден од најголемите проекти во историјата на македонската одбојка – соработката со Jastrzębski Węgiel, европски и полски шампион, проект кој ретко кој клуб може да го повтори.
Благодарение на ова, младите играчи имаа можност да тренираат со врвни играчи, да видат како се игра во елитата, а тренерите на клубот добија едукација од највреднуваните тренери во светот, знаење кое веднаш го применуваа во клубот, со резултати во сите категории.
Покрај тоа што беше претседател, Владо го водеше и тимот како главен играч, привлекувајќи и поддржувајќи врвни странски играчи кои придонесоа за развојот и нивото на клубот. Со својот труд, посветеност и професионализам, Владо создаде пример за сите – играчи, тренери и млади генерации. Покрај спортските успеси, Владо ја изгради препознатливоста на клубот преку меѓународни и еразмус проекти, создавајќи систем и визија кои го поставуваат клубот на европската карта. – стои во соопштението на клубот.
