Екипата на Јанта Волеј го продолжува процесот на екипирање за понатамошниот дел од сезоната и официјално го промовираше новото засилување – младата и перспективна одбојкарка Матеа Попоска.
Попоска има 17 години, а настапува на позицијата техничар. И покрај младата возраст, таа веќе има значајно интернационално искуство, откако го носеше репрезентативниот дрес на Македонија на Европскиот младински олимписки фестивал (ЕМОФ), кој минатата година се одржа во Скопје, како и на U19 Балканијадата во Тирана.
Новата членка на Јанта Волеј доаѓа од редовите на скопската екипа Газели Волеј, каде што со своите настапи го привлече вниманието и се истакна како еден од најталентираните млади техничари во домашното првенство.
Од клубот очекуваат Попоска да донесе свежина, енергија и дополнителна конкуренција во тимот во продолжението од сезоната.
