Есенскиот лидер во Првата македонска фудбалска лига, екипата на Вардар, официјално ги започна подготовките за продолжението од сезоната. „Црвено-црните“ денеска го имаа првиот собир и тренинг во тренинг-центарот „Хиподром“, со што беше означен стартот на зимскиот подготвителен период.
Првата фаза од подготовките ќе се одвива во Скопје, а на 13 јануари вардарци заминуваат во Сиде, Турција, каде што ќе престојуваат до 3 февруари. Во Анталија ќе се темпира формата преку шест пријателски натпревари, од кои пет веќе се договорени. Ривалите доаѓаат од неколку европски шампионати, што ќе биде вистински тест за формата на тимот.
На првата прозивка не беа присутни странските фудбалери Роџерс Мато, Фаустин Сенхор, Ибрахим Олаосебикан и Ворен Чимпембе, кои дополнително ќе му се приклучат на тимот во Скопје. Од клубот информираат дека во овој момент не се планираат нови засилувања, бидејќи стручниот штаб смета дека постојниот ростер е доволен за предизвиците што следуваат. Можно е да има одредени заминувања, но станува збор за фудбалери со мала минутажа.
Распоред на пријателските натпревари:
-
17.01 – Јаблонец (Чешка)
-
20.01 – противник во најава
-
23.01 – Мотор Лублин (Полска)
-
26.01 – Махачкала (Русија)
-
29.01 – Акхмат Грозни (Русија)
-
02.02 – Алашкерт (Ерменија)
Вардар во пролетниот дел влегува како лидер на табелата со 42 бодови, еден повеќе од Струга, и со јасна цел – напад на шампионската титула и освојување на Купот на Македонија.
