Одбојкарите на Штип УГД ги завршија настапите во Челинџ купот на ЦЕВ, откако и на реванш-натпреварот во Италија беа поразени од фаворизираниот Алијанц Милано со максимални 3:0. Италијанскиот претставник повторно ја оправда улогата на апсолутен фаворит и славеше по сетови 25-18, 25-19 и 25-17.
Поразот во Милано значеше и официјален крај на европската приказна за македонскиот вицешампион, кој и на првиот натпревар одигран во Радовиш загуби со идентичен резултат. Иако Штип УГД се обиде да пружи посилен отпор, разликата во квалитет и искуство беше очигледна.
На реваншот, штипјани настапија без првиот тренер Кристиан Ристевски, кој поради здравствени проблеми не отпатува во Италија, па екипата беше предводена од помошниот тренер Ванчо Санев. Најефикасен во редовите на Штип УГД беше Засмард со 13 поени, Илиев додаде 6, а Алексов 5 поени, додека кај Милано, Ичино исто така заврши со 13 поени.
И покрај елиминацијата, Штип УГД може да биде задоволен од европската сезона. Македонскиот претставник претходно го елиминираше норвешкиот Кол Ил по „златен сет“, со што обезбеди историски пласман во 1/16-финалето на Челинџ купот – резултат кој ќе остане запаметен во клупската историја.
По европската авантура, фокусот на Штип УГД сега целосно се префрла на домашните натпреварувања. Штипјани ќе атакуваат на одбрана на Куп-титулата и борба за шампионскиот трофеј, со амбиција оваа успешна сезона да ја заокружат и на домашната сцена.
