Прволигашот Струга Трим Лум денеска официјално ги стартуваше подготовките за пролетниот дел од Првата македонска фудбалска лига. По завршувањето на зимската пауза, фудбалерите се собраа на Градскиот стадион во Струга, каде што го одржаа првиот тренинг во 2026 година под водство на тренерот Бледи Шкемби.
Собирот беше закажан за 13:00 часот, а на него се појавија сите фудбалери кои во изминатиот период ги искористија своите одмори. Стручниот штаб ги запозна играчите со планот и динамиката на подготовките, со цел тимот што подобро да се подготви за продолжението на сезоната во домашниот шампионат.
Првата фаза од подготовките Струга Трим Лум ќе ја реализира во Струга и ќе трае до 17 јануари. Во овој период се планирани и два контролни натпревари, кои ќе послужат како проверка на моменталната форма. На 17 јануари експедицијата ќе отпатува за Анталија, Турција, каде ќе се одвива главниот дел од подготовките. Таму стружани ќе останат до 31 јануари и ќе одиграат неколку пријателски натпревари против странски екипи кои исто така ќе се подготвуваат во Турција.
На првиот собир во 2026 година беа присутни сите фудбалери, со исклучок на напаѓачот Басиру Компаоре, кој ќе ѝ се приклучи на екипата во текот на утрешниот ден поради откажување на летот со кој требаше да патува од Истанбул за Скопје.
Останатиот дел од тимот беше комплетен и денеска го одработи првиот и единствен тренинг. Од утре, екипата ќе тренира со по две тренинг-сесии дневно, а со вакво темпо ќе се работи до 17 јануари во Струга. По враќањето од Турција, на 6 февруари ќе се одигра и генералката против ГФК Охрид.
Добра вест за клубот е враќањето на Ард Касами, кој повторно е дел од тимот по завршувањето на последната фаза од рехабилитацијата во Хрватска. Касами се опоравуваше од тешка повреда на предниот вкрстен лигамент (ACL), заработена на тренинг во септември минатата година. Во наредниот период тој ќе започне со индивидуални тренинзи под будното око на стручниот и медицинскиот тим.
Струга Трим Лум во пролетниот дел влегува со високи амбиции, откако есенскиот дел од шампионатот го заврши на второто место со 41 бод, само еден помалку од лидерот Вардар. Борбата за титулата во Првата македонска фудбалска лига ветува возбудлива и неизвесна пролет. Пролетниот дел Струга го отвара против Шкендија.
